Volume Iii Part 60 (1/2)
THE EARL OF OXFORD TO JOHN PASTON[258.6]
_To owre right Trusty and welbeloved John Paston_
Right Trusty and welbeloved we grete yow well. And where as it is not unknowen to you that we wrot a bille to Maister Brakle, and yaf hym in comaundement to delyver yow a bille indentyd of x. mark owyng to John of Fen, as it apperith by a bille indentyd under the seall of Robert Reppis, jentylman, wich by the will of John of Fen is due un to us, wher of the sayd Robert shuld paye v. mark by his owne instaunce at Lammesse next comyng; We pray yow that ye woll receyve the forsayd money for us and delyver it un to Maister Brakle as we trust yow. Wretyn in owr manor of Wevenho the xxv^ti. day of Julij.
[Footnote 258.6: [Add. MS. 34,888, f. 166.]]
438
THE EARL OF OXFORD TO JOHN PASTON[259.1]
_To my right trusty and right welbeloved John Paston._
Right trusty and right welbeloved, I grete you wele. And I am enfourmed that William Mathew of Norwich, Bocher, hath brought an accion of dette agayn Nicholas Hert, a tenaunt of myn, berer hereof, and hath supposid by his accyon that my said tenaunt shuld ow hym lxx_s._ for his hire of tyme that he shuld a ben servaunt to my said tenaunt; wher it is said to me for trouthe that he was aprentyce to my said tenaunt, and never othrwise with holde but as aprentice, and owith no mony to haf of hym.
I send to yow my said tenaunt to gif yow clere informacyon of the mater, and I pray you that ye wole calle the jurry before yow that arn impanellid betwen thaym, and opne thaym the mater at large at myn instaunce, and desire thaym to do as concyens wole, and to eschue perjury. And the Trinite kepe yow. If ye take the mater in rule, I pray therof, and wole be content.
Wretyn at Wevenho, the xxviij. day of Decembr.
THE ERLE OF OXENFORD.
[Footnote 259.1: [From Fenn, iii. 138.]]
439
SIR JOHN WINGFIELD TO JOHN PASTON[259.2]
_To my welbelovyd brother, John Paston, Squier._
Brother Paston, I recomaunde me unto you, praying you that ye take the labour to speke with Thomas Ratclef of Frammesden for the delyveraunce of part of an hous which lythe in his wode at Fraumesden, which hous the owener hath caryed part therof to Orford, which so departed, the remenant that remayneth ther in his wode schall do hym lytell good, and yt schall hurte gretly the warkeman and the owener therof also, which is my tenaunt, and [_i.e._ if] the hous schuld be set upon my ground.
I wright unto you in this be halfe, be cause I understood he woll be moche avised by you, and yf he do ony thynge at my request, I schall do as moche that schall plese hym; and also the pore man schall gef hym ij.
n.o.bles or xx_s._ rather than fayle. I pray you be as good a mene for hym as ye may in this be halfe, as my verry trust is in you, and I schal be redy at all tymes to doo that may be to your plesur. I trust to Jesu, who have you in His kepyng, and sende you joy of all your ladyes.
Wretyn at Lederyngham, the Tewesday in Whisson weke.
Your brother and frende,
WYNGEFELD J.
[Footnote 259.2: [From Fenn, iii. 140.]]
440
[JOHN PASTON?] TO [RICHARD] SOUTHWELL[260.1]