Volume Iii Part 2 (1/2)
[Footnote 7.1: [From Fenn, iii. 224.]]
[Footnote 8.1: Thomas Fastolf of Cowhawe. --_See_ vol. ii. p.
323, Note 1.]
[Footnote 9.1: Thomas Bourchier.]
[Footnote 9.2: Ralph, Lord Cromwell.]
267
THOMAS HOWES TO JOHN PASTON[9.3]
_To the wurshepfull Sir, and my good Maystyr John Paston, at London, in haste._
[Sidenote: 1454 / NOV. 13]
Wurshepfull and reverent Sir, and my good maistyr, I recomaund me to zow in as delygent wyse as on my part apperteineth, and p[le]a[s]e yow to wete that my maistyr[9.4] was right well pleasyd with youre feithefull labour in fulfellyng the patent for the warrd of A. B. C., and he wyll feithefully labour as ye have avysed hym be wrytyng of John Bokyng. And putte my maistyr in more corage, I meovyd to hym upon myn hed that encas be the child wer wyse, that thanne it wer a good maryage be twen my wyff youre doutir and hym; and, Sir, my maistyr was glad whan he herd that moyen, cosetheryng that youre doutyr is desendyd of hym be the modyr syde. And, Sir, I have enqwerid aftyr the seyd child, and no dout of but he is lykly and of gret wyt, as I her be report of sondr personez. And it is so, as I am credebly enformyd, that Jeffrey Boleyn maketh gret labour for maryage of the seyd child to on of hese douterez. I wold well to hym, but bettyr to yow. Wherfor that ye delygently labour for expedecyon of this mater, that encas ye can fynde ony moyan ther to have the seyd child, and we shal do feithefully owre delygens in lyke wyse her, as ye avyse us, &c.
And, Sir, as ye thynke with avyse of my Maistyr Yelverton, Jenney, and otherez my maisterez counsell therin, that the Shereff may be rewardyd, and yif my seyd maisterez counsell thynke it be to do'n, that thanne ye lyke to take an actyoun upon anenteynt [_an attaint_],[10.1] wheche ye most with them take upon yow at this tyme in my maisterez absence; for as ye do in that mater, he woll hold hym content, for Wyllyam Barker hathe an instruccyon of my maisterez intent upon the same. And I send John Bokyng a copy of the panell, wheche I shewed yow at Castr, &c.
Almyghty Jesu have yow eternally in hese mercyfull governaunce.
Wretyn at Castr, the Wednysday next aftyr Seynt Martyn, anno x.x.xiij.
TH. HOWYS.
[Footnote 9.3: [From Fenn, iii. 230.]]
[Footnote 9.4: Sir John Fastolf.]
[Footnote 10.1: This is an action against a jury that has given a false verdict.]
268
SIR THOMAS HOWYS TO JOHN PASTON[10.2]
_To the wurshepfull and reverent Sir, my good Maystir John Paston, in all goodly haste._
[Sidenote: 1454 / NOV. 18]
Reverent and wurshepfull Sir, and my good maistyr, I recomaund me to yow in as louly wyse as on my part aperteineth. And please yow to wete that my maistyr is fully purposed to sewe ateynte, whereupon he wrytethe a lettere directyd to yow and otherez, for the wheche I beseke yow to be my good maystyr in pursewyng the seyd ateynte; and also my maistyr is agreed what reward ye geve the Shereff he holdeth hym content. Wherfor, that youre reward may be the larger, so he woll[10.3] ther upon returne the panell for the seyd ateynte; and thanne yef Jenney wold meove my Lord of Norffolke that he wold be my good Lord, amyttyng me for hese chapeleyn, and Jhankyn Porter for hese servaunt, wheche is hese chek roll, it shuld cause the matere to have the redyer expedecyon, as well be the Shereff as be the gret jury. And yef the processe may have so redy sped that it myght be had be fore my Maystyr Yelwerton in this vaccacyon tyme, it wer a gret counfort, &c. Beseking yow at the reverence of G.o.d, and as ever my power servyse may be at your comaundement, that ye effectualy labour this matere in the most spedfull wyse, as youre descrecyon, with Jenneyez avyse, thinketh most expedyent; for I ferre gretly to be outlawed or the seyd processe shuld be brought to a conclucyon withoute redy processe in the seyd ateynte. And I here no sewer tydinges of a parlement; but rather thanne I shuld be outlawed, I wold yeld my self to preson, wheche shuld be myn undoyng, and thanne to be with oute remedy. My refformacyon and counforte in eschewyng that lythe holly in your helpe and Jenneyez at thys tyme, be cause my maystyr hathe comytted the governaunce of the seyd matere to yow, and what expense it draweth he agreyth to bere it, &c.
I beseke Almyghty Jesu have yow, my good maystyr, eternaly in hese me[r]cyfull governaunce, and inspyre yow with hese speryt of remembraunce effectualy to precede in this matere.
Wretyn breffly at Castre the Monday next be fore Seynt Edmond the Kyng,[11.1] anno x.x.xiij. Regis H. vj^ti.
Item, Sir, as for mony to the sped of this matere, Bokkyng hathe redy in comaundement to make delevery to yow what that ye nede, so there shall be no defaute in that, &c.
T. HOWYS.